රෑ අහසේ තරු සහ ග්‍රහලෝක හඳුනා ගැනීම සමහර විට ඔබට ගැටළුවක් වනු ඇත. මෙම ගැටළුව මඟහරවා ගන්නේ කෙසේද?
රාත්‍රී අහස දෙස බැලූ සැනින් තරුවක් හා ග්‍රහලොවක් අතර වෙනස ඔබට අවබෝධ කරගැනීමට නොහැකිය. නමුත් මේ සඳහා ස්වල්ප වේලාවක් ඔබ අහසේ වස්තු දෙස බලා සිටිය යුතුය.
මෙවිට අහසේ ආලෝකය විහිදුවන වස්තුන් දෙකක් ප්‍රධාන වශයෙන් හඳුනාගත හැකිවේ. මින් පළමුවැන්න දිදුලනවා සේ දිස්වන තාරකාය. එනම් නිවි නිවි දැල්වෙන ස්වරූපයෙන් යුත් තාරකාය. සැබැවින්ම මේවා තාරකාවේ. මේවා අපගේ සූර්යයා වගේ දීප්ත වස්තූන්ය. අපගේ සූර්යයා ශක්තිය නිපදවනවා සේ මෙම තාරකාද ශක්තිය නිපදවයි. තරුවක් ලෙස ශක්තිය නිපදවන්නේ න්‍යෂ්ඨික ප්‍රතික්‍රියා වලිනි. නමුත් සූර්යයාගෙන් ලැබෙන තරම් මෙම තරුවලින් ශක්තියක් අපට නොලැබෙන්නේ මේවා අපට ඉතාමත් දුරින් පිහිටන නිසාවෙනි.
එසේම තාරකා වල ඇති තවත් වැදගත් ලක්‍ෂණයක් නම් තරු දෙකක් අතර ඇති දුර වෙනස් නොවීමයි. එනම් තරු රටාවක ඇති ඕනෑම තරු දෙකක් අතර ඇති දුර ප්‍රමාණය දිනය අනුවත් වෙලාව අනුවත් වෙනස් නොවේ.
ග්‍රහලොවක් මීට වෙනස්ය. සෞරග්‍රහ මණ්ඩලයේ ග්‍රහලෝක 8න් අපට පෙනෙන්නට ඇත්තේ නැතිනම් පියවි ඇසින් නිරීක්‍ෂණය කල හැක්කේ ග්‍රහලෝක පහක් පමණයි. මේ ග්‍රහලෝක තාරකාවලින් වෙනස්වේ. තාරකා දිදුලන ස්වභාවයක් පෙන්නුම් කලද ග්‍රහලෝක වලින් දිදුලන ස්වභාවයක් නොපෙන්වයි. මේවා ඒකාකාර ආලෝකයක් විහිදුවයි. එසේම මේවා තමන් විසින්ම ආලෝකය නිපදවාගන්නේ නැත. ග්‍රහලෝක කරන්නේ තමා මත පතිත වන ආලෝකය පරාවර්ථනය කිරීමයි. මේ පරාවර්තිත ආලෝකය අපවෙත ගමන් කිරීම නිසා දීප්තිමත්ව පෙනේ. එසේම ග්‍රහලෝක දවසින් දවස පිහිටන ස්ථාන වෙනස්වේ. මේවා තරු රටා 12 පසුබිම් කරගෙන චලනයේ යෙදේ. මේ අනුව එක් දිනයකදී එක්තරා තරුවකට ආසන්නයේ පිහිටි ග්‍රහලොවක් ඊලඟ දිනයේදී එම තරුවට දුරින් පිහිටිය හැක.
දැන් ඔබත් රාත්‍රී අහස නිරීක්‍ෂණය කර තරුහා ග්‍රහලෝක හඳුනා ගැනීමට උත්සාහ කරන්න. අපට පියවි ඇසට දැකිය හැකි ග්‍රහලෝක වන්නේ බුධ, සිකුරු, අඟහරු, බ්‍රහස්පති සහ සෙනසුරු වේ. අපට පියවි ඇසට නොපෙනෙන ග්‍රහලෝක වන්නේ යුරේනස් හා නෙප්චූන්වේ. මෙම පියවි ඇසට පෙනෙන ග්‍රහලෝක අපට එහි විශාලත්වයෙන් හා පැහැයෙන් හඳුනාගත හැකිවේ. එනම් බුධ - අඳුරු අළු පැහැයෙන්, සිකුරු - දීප්තිමත් කහ පැහැයෙන්, අඟහරු - රතු පැහැයෙන් හා සෙනසුරු - තැඹිලි කහ පැයෙන් වශයෙනි.
ලිපිය සකස් කර අපි දන්න අපේ කලාව වෙත ලබා දුන් අම්පාර පොලීසියේ සේවය කරන එච්. ආර්. අනුර බණ්ඩාර මහත්මයාට ස්තූති වන්ත වෙමි.
No comments:
Post a Comment